Beātus vir quī nōn abiit in cōnsiliō impiōrum,
Et in viā peccātōrum nōn stetit,
Et in cathedrā pestilentiae nōn sēdit;
Sed in lēge Dominī voluntās ejus,
Et in lēge ejus meditābitur diē ac nocte.
Et erit tamquam lignum quod plantātum est secus dēcursūs aquārum,
Quod frūctum suum dabit in tempore suō:
Et folium ejus nōn dēfluet;
Et omnia quaecumque faciet prosperābuntur.
Nōn sīc impiī, nōn sīc;
Sed tamquam pulvis quem prōjicit ventus ā faciē terrae.
Ideō nōn resurgent impiī in jūdiciō,
Neque peccātōrēs in conciliō jūstōrum:
Quoniam nōvit Dominus viam jūstōrum,
Et iter impiōrum perībit. ALLĒLŪIA
From this macronized Latin text of the Psalter: The Book of Psalms: A Latin Reader with Macrons